打得火熱(2000年9月)

呢篇嘢係我與好友sillyten一齊作, 自己感覺好怪, 好似模仿李重言咁......還請各位指教.

曲目:
01. 打得火熱
02. K歌之王
03. 活躍症
04. 低等動物
05. 新廣告歌
06. 美麗謊言
07. 綿綿
08. 吹微風
09. 溫室效應
10. 下周同樣時間(再見)

你當然可以說《打得火熱》又是一堆K歌+一堆悶歌，倉促之下水準參差，同《Nothing Really Matters》不同級數。是趕得太急，暑假先轉公司，九月尾已經出碟，翻唱勁多，甚至拎出自己儲了多年的“私伙”；但新公司新人事新作風，陳奕迅由形象到唱腔，已經進化。

封面一洗華星時的娘味，已經先聲奪人；做設計的林海峰固然功不可沒，但影相嗰位，可以執到咁sharp，上緊位的霸氣突晒出來，都算幾犀利。

這張碟是英皇(Music Plus)時期兩大監製第一次同場獻技，陳輝陽包起第一二首派台歌，當然搶過負責執sidetracks的王雙駿；另外有CY Kong監製了一首情欲K歌。

打得火熱
揀打得火熱作轉公司第一plug十分明智，因為此曲完全確立了新形象，放肆得來又趣怪，好醒神，在當時雷式fing頭歌氾濫的市場中輕易脫穎而出。長達半分鐘intro已經非常搶耳，在你以為他要開唱時突然鼓聲一轉，等你熱多陣身先；旋律方面，verse就好過chorus，後者給人感覺平淡少少；至於Eason扭的那支怪舞，想必都令你過目不忘。

K歌之王
食正K場熱條水，旋律又正統，歌詞和編曲又配合到(國語版仲要MV都配合)，怎麼可能不熱爆全城？值得一提的是，在陳輝陽調教下，Eason用了一種完全不同的唱腔，華星時的扮成熟、後天修飾痕跡過重的缺點完全不見，向流暢派又邁進一步。Eason這把唱K聲，雖然都用了技巧，但給人的感覺自然好多；加之感情運用得體，第二段歌詞感情推進，他都乸實塊面唱做樣，好多第一段時的假聲位都用返真聲，將旋律逐級逐級推到高潮，是絕頂K歌示範作。

活躍症
我會將黃偉文以下作品歸為一個Custom Made系列，因為陳奕迅以後若干年的傳媒形象，應該都離不開以下三樣：癲(《活躍症》)、講嘢唔經大腦(《沖口而出》)、《黑面》。活躍症雖然是翻唱歌，但打上很深的王雙駿烙印，聽者情緒會被旋律和節奏完全牽制，可見其高招。

綿綿
綿綿更像是柳重言失手寫壞的K歌，編和唱也十分簡單，但勝在，林夕好得。原作小說只不過是一個線條簡單敍事普通的故事，但林夕將它靜止化，截取其中一個場景，不需要對白，只給出分鏡，任由畫面閃過，讓你在很多年後，甚至已經記不起這歌怎唱，卻怎麼也忘不掉那些吸不透的香煙、代我傷心的唱片，和一個夏雨天，一次愉快的睡眠，斷多少發線。

下周同樣時間(再見)
做成百老匯風格的創意很好，但Eason把聲好似游離在首歌之外；配器可以再精簡，突出旋律，增加現場感。

剩下幾首sidetracks，有學友式的《吹微風》，也有《熱帶雨林》前傳《溫室效應》，不過如果你不是fan屎，相信也分不出邊首打邊首，算吧。

Music Plus時期這張熱身作，整體性欠奉，快歌不少，也都算玩得幾放，但就未夠《第五個現代化》經典；整張碟更像《K歌之王》的附屬品，所以下一張碟，陳輝陽來了。

2006之K歌養大我

06年沒有令人嘩一聲的唱片，但我個list好長，慎入。

男歌手

陳奕迅
我中意Eason，的確是因為佢每張廣東唱片都好聽(國語暫時未聽齊)。

《Life Continues》
慢歌唱到街知巷聞，快歌都可以un下un下。用咁樣一句話概括一張我聽了三個月的碟，係咪求其咗d？Eason話呢張碟好“自己”、好私人，但佢傳遞出的訊息，應該不難接收到。我唔敢話呢張碟非常之出色，但作為U87的接棒作品，絕對唔算失禮。

《Get A Life》
個show一路都未睇到，因為我一路都為洗唔洗呢170蚊掙扎緊。= = 由CD聽來，《傷信》到《黑夜不再來》幾支歌在管弦樂團的參與下固然得到了昇華，但最令我驚喜的仍然是佢連嗰一年我最喜愛之《兩名男子街頭相遇》都唱到，仲唱出studio版表現不到的生動感，十分滿足。

《What's Going On...?》
對於這張唱片，坊間那些神乎其神的讚美說話，總讓我心存疑惑：真的有那麼好？為什麼我(唯一)的心水，《解藥》，總是被樂評家們輕輕帶過？我唔識講嘢，所以由頭至尾我都只識講，“首歌個chorus好正”，或者“的確似John Lennon邊彈邊唱咁”；同時，我又唔識聽歌曲d feel架，觸動我的應該都唔係人哋話嘅嗰種“灰灰哋嘅感覺”。咁邊個替我寫我d感覺出嚟？
有些類似《我的快樂時代》，全部旋律都可做k歌寫作教程，但多年後最記得的，是佢自己作的嗰兩支。

《I Had A Great Time》
以現今的標準來睇，如果呢張唱片喺04年出到街，EEG plug《一切還好》，就真的hit得起麼？口口聲聲話樂壇唔需要咁多k歌，好，一次過俾晒你十首唔k但旋律好好的歌，煲下啦。
忘記講，我其實都幾欣賞當年EEG(?)揀打得火熱同沖口而出做主打的眼光。

在所有人都“為免犧牲，情願被同化”的時候，那個可以keep住有嗰句講嗰句的陳奕迅，成為了我們未完成心願的投射對象。我諗我中意Eason，唔單只因為佢唱片好聽咁簡單。

陳浩峰《補習之迷戀》
對於非劇迷亦無志願成為劇迷的我來說，旋律好聽，歌詞漂亮，嗓音迷人，威力都及不上一首《唱K回憶錄》。我正是他們寫(諷刺)的那種人，由起首的jingle組合開始，他們一路都在引發我的回憶，沒錯，由聽歌、唱k、到寫呢篇嘢，我要找的都不過是想像中的我。

黃耀明《若水》
好過預期很多，唱國語亦可接受。

Eric Kwok《廣東大碟》
如果要寫“麻甩佬的快樂一天”，郭偉亮一定是最佳人版。冇錢冇閑，都可以聽《是但，求其，冇所謂》嘆下嘅。

方大同《愛 愛 愛》
未聽過陶喆的唱片，方大同跑不跑得贏佢暫時未敢講。我只敢說，在電台死播狂爛播的情況底下仍能令人覺得好聽，你都算犀利喎。

李克勤《演奏廳Ⅱ》
大件夾抵食。行街聽得，搭lift聽又得，瞓前聽得，瞓著咗聽都仲得。如果不是對李克勤有抵觸情緒的人，買來聽下樂器聲都抵嘅。當然，Hacken兄低音醇，中音靚，高音就不敢恭維了，那些非常“市井”的破音，私以為有些破壞氣氛囉。

女歌手

關淑怡《Shirley Kwan》
你能想像郭靜寫得出《帶我去跳舞》這樣的旋律麼？除了關淑怡，應該無第二個handle到。“一切變得快，又好像沒變過”，Shirley d歌，十年後聽，都不會out。

謝安琪《K sus2》
如果《Kay One》還可以用“得意”、“可愛”來形容的話，《K sus2》就是一本正經，正經到“好似說明文”咁。我不是什麼“海豚音”迷戀者，題材選得好也只是bonus，就歌論歌，最愛始終是《亡命之途》。旋律一層一層鋪排得漂亮，兩個版本的編曲亦都不俗。
(本來諗住大家“同歲”，又由佢出道第一支歌就撐佢，我都算睇住佢大嘅；怎料佢行得咁前，我真係拍馬都追唔到啦。哈，佢係喪婆嚟架嘛！)

楊乃文《女爵》
喜歡她，她的聲音有天生的吸引力。

何韻詩
梁祝之後，Hocc的快歌和慢歌各走入一個套路，耐聽，但缺乏一擊即中的爆發力。《滿城盡帶黃金甲》是06年唯一一首衝破這個悶局的作品，型。

王菀之《詩情. 畫意》
《畫意》之後，我終於都接受到佢啦！那些“懶”cutie的作品，我都當佢真係咁cutie啦！但我係都唔明點解專輯中佢唱唱下突然會有一首普通之極的大K歌，好唔夾。

組合

軟硬天師《Long Time No See》
唱片聽過，show睇過，tee著過，最尾連DVD都買埋。我的千幾蚊，可算是為兩位1200萬的湊仔(女)大計盡過一分綿力？07年是林狗出碟年，但我只是希望，下年响叱咤台能看到您的免費show，因為在我心中，軟硬最叻就是識得幾時收手。

Shine《Shine On》
計起上來，我同Shine都算同年，大佢哋幾個月啫。佢哋少年得意唱18相送時，我在為尋找米飯班主煩惱；幾年後聽番半成年，大家都多份唏噓。是，但願登天不過未上，但Wyman多年來慷慨送出的廿零首歌詞，夭心夭肺，我一世都記得。

農夫《音樂大亨》
他們沒有LMF的音樂震撼力，也沒有那麼強的批判性；冇咗Gigi，農夫兩個哥哥更是徹底褪去indie味，只要人人開開心心個個興興奮奮就好。在電台活動中，在別人專輯中，隨處可見他們的hiphop天分，他們給王浩信做featuring，結果搶晒鏡。

EO2《Stand 4》
在聽呢張碟之前，我同你一樣，分不清EO2和E-Kids，唯一有印象的歌是“大丈夫可否有想過，一生女伴共多少”。多謝商台(森小)，讓EO2在艾粒和17妹的重重包圍下跑出，從前坐足4年“年年戴頂雪山飛狐look冷帽”嘅嗰條友，終於都有得上台。聽第一plug，心諗，多得Carl叔叔同阿Y；第二plug，咦張繼聰又幾得喎；第三plug又是入型入格的“low-fi電子聲”……成隻碟都幾好，多謝歌少。

達與璐《達與璐》
我唔中意近幾年明哥把聲，對呢個Lulu也好感有限。Easy listening，好聽，應該不是阿達想要的全部吧？唯一的啟發是，《The Party》是一張被編壞了的碟。

其他

劉浩龍/謝安琪《滄海遺珠》
合唱這首歌時，兩個人都算是“有遺珠feel”的歌手；如今阿Kay(多多少少)借嗰單嘢跑出，剩低C兄一個前路未明。C兄，你的歌迷等足你七年，唔介意等多一陣架！

陳小春《劫數難逃》(Rock da man Remix)
無他，只是令我想起我的04年金曲“更多更多，噢，更多更多，噢，蝦肉更多更多...”。

鄭希怡《Passion》
奇怪的是，同王雙駿合作咗咁多次都擦不出火花的Yumiko，離開Carl叔叔後竟然唱到好啱佢唱的《狼女》《用完即棄》...等歌。

《自作自樂 Demo Project》
馮穎琪贏晒！金培達、藍奕邦、郭偉亮都好出色。

十大

俗 - Shine
解藥(最佳損友) - 陳奕迅
畫意 - 王菀之
亡命之途 - 謝安琪
數你不是 - 馮穎琪
唱K回憶錄 - 陳浩峰
帶我去跳舞 - 關淑怡
係咩唔係喎 - 軟硬天師
愛似林一峰 - 農夫
滿城盡帶黃金甲 - 何韻詩

係咁先。

有骨

今時今日的網絡世界, 最重要的品質係乜? 唔係講嘢有point, 而是要有骨.
你好正經咁講嘢, 唔會有人so你, 不如一逞口舌之快, 攪旺個人氣先; 又或者, 俾人寸咗, 冇番咁上下刻薄, 你點樣即刻寸番佢呀!

但, 諸位fans, 即使你好滿足於單單打打的刺激, 都請加番少少想象力. 講親都係容祖兒無料、只識唱慘歌、靠楊生上位, 好悶囉. 事實容小姐聽過好多只唱碟, 仲好識貨添, 勁過嗰兩位口口聲聲話"好有heart做音樂"的GL歌手好多架. 許志安做戲又一定好難睇? 話晒人哋靠把聲搵食廿幾年, 你班電視台中生小生做戲叻過佢唔出奇, 講臺詞就一定唔夠佢冧喇!

以上是插播, 以下講番正經嘢.

大概是活著太累, 所以一定要有刺激啩. 訪問一定要讀余家強的豪語錄, 因爲夠刺激; 無無聊去各大forum踩金句天后/老鼠安/好勝琪, 應該都幾刺激(Uwants太溫和, CM太幼稚, discuss.com至多算初級班, 想出師, 點都要去she.com進修下嘅).

后尾讀到呢篇beautiful losers, 好勁, 因爲佢令我知道, 讚揚和批評如果中晒, 根本無需用過分濃烈的感情去表達. [我諗我中意Wyman, 都是因爲文中提到的嗰種"庶民氣", 佢出身油痲地榕樹頭, 無法提供給你任何高級的幻想;] 佢唔識講嘢, 一向有嗰句講嗰句, 但寫出的文章, 一樣可以咁刺激.

我應該絕口不提我每位偶像的對手, 因爲, 我恰恰是那種句句有骨、偏偏轉數很慢的人. 你閙我, 我招架唔住架.

Shine On

據統計, Shine當年的歌迷年齡, 由小學至中五不等.
我超晒齡.(Post咗好大一張圖, 咁先自有妹妹fans本色!)

明日天佑又南會去叱咤樂壇做新碟發佈. 他們可能不知, 就在兩日前, Mini、Joey、Kay三人在估完at17 02年出道拎新力軍組合銀后, dead air了足足半分鐘, 都無法記起金獎被邊個拎走. 其實那一年, Shine何止拎新力軍金, 連組合金都拎埋. 新人單位一出道就攞金獎, 叱咤歷史只此一次.

威水史不多講, 講下只碟先.

這張"有可能是Shine最後一張"的大碟, 開頭好勁, 結尾都好勁, 中間就好普通.

開頭有幾勁唔使多講. 除了歌詞, James Ting可以在<俗>副歌完結之後接上那麽漂亮的兩段旋律, 實屬驚艷. 天佑又南, 跟定Evi Yang, 間中搵番James Ting和Wyman, 大把前途.

中間之所以普通, 是因爲Shine根本不需要慘情. 難爲了林夕, 明明是一首慘情歌, 還要特登加上"長大""成年"這樣的字眼, 倒不如一早留番給張敬軒好過. Shine的情歌, <伊麗莎伯太遲來>同<盜日者>都是高幾班的作品, <簡單而隆重>和<避雨>就普普通通, 好彩今次又有新嘢彈出來.

新選擇就是<二手之家>(如果可以算作情歌的話). 多得英師傅, 整首歌的感覺很像free love之前的Hocc, 任性活潑, 偶爾癲癲哋. 也都是托賴英師傅, 周國賢寫的那首歌才沒有被"rock"到俗晒. 而以藍生的鋼琴曲作結尾, 算是很好的總結篇, 哪怕這是最後一只碟的最後一曲, 都不算少年枉費.

好求其咁寫咗幾句嘢, 都為hard sell佢哋啫.
你中意天佑定又南多D?

好耐無更新

實情是, 我每日除咗睇forum、睇蘋果、睇實903 D airplay、聽番舊programme、間唔中再睇D專業書外, 真是冇乜嘢好做. 所以, 一係就post D食譜上來, 一係就……係啦, 又係佢啦 ——

Wyman

聽完港台八集<經典背後>訪問. 初頭覺得「行」, 邊有人數人哋嘅代表作由<我的驕傲>數起架? 唔通首歌因"fly笠high"紅番? 不過後尾講到Eason同Hocc, 都算係咁啦~

商台發仔做<一切從音樂開始>, 前後四集, 大喇喇十四粒鐘喎, 播D咁嘅歌你叫我點收貨吖. 如果是我, 就將幾個系列一齊播, 然之後播好多Shine, Joey就out咗佢(我都知蟹后D歌好hit, 但都唔使支支播兩次咁多啩). 另外, 兩首玩嘢之作一定要播, 就是<新曲+精選>(每一粒字都是歌名)同埋<唔知係咩嘅我就點會講>(全文得十個字, 發仔播咗, 但就讀錯個名).

阿Y今年的作品, 我覺得都OK, 只有劉浩龍實屬不幸, 收到<記得>這種"橫看點看都似打麻雀被催交稿"的作品. 至於<裙下之臣>, 被更正幾多次都好, 我都覺得似寫裙多過寫女人囉.

方杰

我從未仔細讀過方杰的詞作, 但他短文寫得生鬼有趣, 你睇吓有幾多人追睇壹仔電視表就知.

黃仲凱

一句"流汗你也要趁快地流, 謝幕便要走", 賺盡小人物眼淚.

看到好多人在寫年度十大 —— 年度十大, 怎能不留番個靚位畀<I had a great time>呀!

亞視型D?

Wyman近日出鏡率那麽高, 作爲一個以貼專訪爲職業的人, 一日内見到3篇以上"亞視型過TVB"的文章, 一點都不出奇.

其實我都曾經是一枚亞視番薯仔, 迷戀過呂頌賢、甄志強、萬綺雯, 倪震先生說"你睇田蕊妮個樣幾sharp"時我都好有自豪感.

但我最近一次看到結局篇的劇, 是上年六月的"星願"; 至於以大卡司作賣點的"大冒險家", 則因爲吃不消黃子華扮傻而中途放棄.

在我眼中, 亞視劇一向都"奇情"、"K型" —— 大概是因爲畫面蒼白, 場面又冷清, 每一幕戲就只得那麽幾個主角在場, 如果不離奇些, 驚你悶. 大人或者覺得這些編劇太好想象力, 編出這種根本無可能發生的故事, 但對細細個的我來説, 這些劇情好入腦的!

講番型唔型的話題, 或者細的型, 大的唔型; 少人中意的型, 多人中意的唔型; 但細嗰個可以玩得癲些, 卻是事實, 幾型!

阿Y, 或者你之前幾型, 做完咁多訪問之後變唔型, 唔緊要, 我實撐你架!

--
後來阿呂拍笑傲江湖, 是但咁發聲, 完全不是誇張的TVB腔, 正! 但若干年后見到大配角甄志強, 咦, 真是認佢唔出.

Gala Gala Happy

一個人行街、唱k、睇演唱會, 係未好無癮呢? 查實我有社交障礙, 與其咁辛苦應付別人, 不如應付自己好過.

一個人都來睇你, 我一定係好迷戀你.