由收音機開始

前陣電台播過一支好鬼嘈的歌, 叫做"由收音機開始", 幾好聽喎, 真是黃貫中轉世, Beyond不死. 跟住收音機聽音樂已經是上個世紀的事啦, 林狗在棟篤笑還模仿過吳君如(等人)嚇死人不償命的笑聲, 所以, 如果你是朝八晚十二周末還要瞓個懶覺的乖仔一名, 就等著被嘈冤巴閉的DJ們嚇親吧.

肯播歌的DJ也不是沒有. 我每朝早六時起身, 七時出門, 夜晚十點已經眼睏得不得了, 都能搵到一個靚位, 坐定了等心愛的DJ們播歌給我聽, 兩輪下來, 最新派台歌都能聽個遍啦. 第一位, Donald, 摩羯座, 周六6:00-9:00有My當奴, 可愛有趣不特止, 兼有少少少爺占沒有的矜持. 第二位就是周日同一時段的小禮堂, 雙魚座的梁文禮夠晒溫柔, 而且節目主題曲又特別好聽 —— 缺點就是節目之前有一個超級難頂的佈道節目(全無對神明不敬之意, 實在吃不消主持人那把聲).

近排, 我download了絕情谷全集日日聽. 倪震先生凴這個節目收服了幾多fans我就不知, 但真的有好多人終于都肯承認"俾佢得到Vivian是應該的". 我呢, 活到這麽大, 散拖也拍過幾次, 今日才明白, 揀男友, 有無品味還在其次, 有品先是至緊要. 講開這個話題, 有一次奪命估的題目是"五大絕頂性偶像" —— 當然, 我都知道吳彥祖碧咸好性感, 但如果是我, 就一定揀側田: 因爲佢真是好Man, 肯為你去同邊個邊個決戰拼命硬, 同埋, 佢真是"絕頂", 兼肯用condom喇！

是文紀念兩檔即將"執笠"的節目.